Lea-Artibai eta Mutriku

Txapela jokoan, joko orekatua egin zuten Ibon Aldazabal (Berriatua, 1987) eta Xabat Uriozarbarrenak (Etxebarria, 1986) Durangon, domekan. Berriatuarrak ondo jokatu zuen atzean, pilota dominatuta, eta aurrelari on legez, aukera ikusi orduko amaitu zituen tantoak etxebarritarrak.

Andoain eduki zenuten aurrean finalean. Zelan joan zen partida?

Ibon Aldazabal: Nahikoa parekatua izan zen, eta beti ere gu bi-hiru tanto aurretik joan ginen, hasieratik. Inoiz, berdinketa pare bat ere egon ziren. 17-15 irabazten gindoazela pilota apurtu zen, eta pilota aldatzeaz batera hasi ginen tantoak egiten. Bederatzi-hamar egin genituen segidan.

Xabat Uriozarbarrena: Partida apurtu zen hantxe.

Bigarren pilota ezberdina zen?

Aldazabal, I: Ez, baina pilota berria dagoenean, beti ere, jokoa aldatu egiten da. Andoaingo aurrelaria ere pixka bat hutsak egiten hasi zen, eta segidan, 35era joan ginen.

Urizarbarrena, X: Eurek huts egin zuten, eta gu gero eta konfiantza gehiagogaz hasi ginen jokatzen.

Aurreko emaitzak ikusita, faboritotzat zeneukaten zeuen burua?
Aldazabal, I: Beti daukazu konfiantza irabazteko, baina beti daukazu beldurra ere, edozer pasa daitekeelako. Azken batean, denboraldi osoa gustura eta ondo egin arren, partida bakoitza mundu bat da. Edozer pasa daiteke.

Urizarbarrena, X: Nahikoa urduri nengoen hasieran, eta partidan sartu ahala, lasaitu egin nintzen.

Zuen jokoaren gakoa non dago?

Aldazabal, I: Talde lanean gehienbat. Ondo konpontzen gara. Beti ere,
piloteora jokatzen dugu, eta aukera dagoenean, Xabatek aurretik amaitzen du.

Urizarbarrena, X: Ahal denean errematatu egiten dut.

«Garrantzitsuena parte-hartzea da». Baina irabazita, hoteto.

Urizarbarrena, X: Azkenean, denek nahi izaten dute irabazi.

Aldazabal, I: Irabazita amaitzen baduzu, handiagoa da poztasuna.

Xabat, zuri zer eskaintzen dizu Ibonek?

Urizarbarrena, X: Zuloa ondo zaintzen du, pilota atzeratu egiten du asko, eta lagundu egiten dit, sekula gutxietsi barik.

Eta zuri, Ibon, Xabatek?

Aldazabal, I: Elkar ondo ulertzen dugu. Entzuten ere badaki, eta hori eskertzekoa da. Amaitzailea da, eta sarritan eskertu egiten da piloteo luzeen ostea.

Txapela zeini eskaini diezue?

Aldazabal, I: Oraintxe hilabete hil zitzaidan aita, eta beti pentsa izan nuen berari eskaintzea. Beragatik heldu naiz heldu naizen lekura, eta berari, aitari.

Urizarbarrena, X: Nik ere aitari, azken batean berak lagundu dit. Gurasoentzat da nire txapela.